Польшийн Краков хотноо 7 дугаар сарын 2-3-ны өдрүүдэд болсон Ардчилсан орнуудын хамтын нөхөрлөл /АОХН/-ийн 10 жилийн ойд зориулсан сайд нарын түвшний уулзалтад Гадаад харилцааны сайд Г.Занданшатар оролцов.

Тус уулзалтад АОХН-ийн гишүүн 20-оод улс орны сайд нар оролцож дэлхий дахинаа ардчиллын өмнө тулгараад буй сорилт бэрхшээл, түүнийг гэтлэн давах арга замын талаар хэлэлцэж ярилцав. Уулзалтын үеэр болсон сайд нарын түвшний хуралдаан дээр Гадаад харилцааны сайд Г.Занданшатар товч үг хэлэхдээ ардчиллыг бэхжүүлэх үйлсэд сайн засаглал чухал болохыг онцолж, ардчиллын төлөөх үйлсийг сэргээн эрчимжүүлэхийн ач холбогдлыг тэмдэглэв.

Сайд нарын түвшний хуралдаанд гол илтгэгчээр оролцсон АНУ-ын Төрийн нарийн бичгийн дарга Хилари Клинтон ардчиллын үйл явцад оруулах иргэний нийгмийн байгууллагуудын үүрэг ролийг онцлон ярив. АОХН-ийн хүрээнд иргэний нийгмийг чадавхжуулах хамгаалах чиглэлээрх ажлын хэсэгт Монгол Улс орж байгаа бөгөөд уг ажлын хэсгээс гаргасан зөвлөмжүүдийг Хилари Клинтон хэлсэн үгэндээ сайшааж байв.

Сайд Г.Занданшатар Канадын Гадаад хэргийн сайд Лорэнс Каннон, Литвийн Гадаад хэргийн сайд Аудронис Азубалис, АОХН-ын Байнгын нарийн бичгийн даргын газрын захирал Бронислав Миштал нартай уулзалт хийж, хоёр талын талын хамтын ажиллагааны өргөн хүрээтэй асуудлаар ярилцаж санал солилцов.

Энэ удаагийн өндөр түвшний уулзалтын үеэр парламентын гишүүдийн чуулга уулзалт, залуу диломатчдын уулзалт болж, ардчиллын төлөөх бизнесийн хүрээнийхний чуулга уулзалт эхлүүлэхийг санаачлан зохион байгуулав. Парламентчдийн чуулга уулзалтаас гаргасан баримт бичигт Гадаад харилцааны сайд Занданшатар гарын үсэг зурав.

Товч лавлах: АОХН-ийг үүсгэн байгуулахыг Польшийн Гадаад хэргийн сайд Бронислав Геремек, АНУ-ын Төрийн нарийн бичгийн дарга Мадлейн Олбрайт нар санаачилсан. Польшийн нийслэл Варшав хотноо  2000 оны 6 дугаар сард хуралдсан Гадаад хэргийн сайд нарын анхдугаар бага хурлаар АОХН байгуулагдсан. Манай улс 2005 оны 9 дүгээр сараас эхлэн АОХН-ын Зөвлөлдөх бүлгийн гишүүнээр ажиллаж байгаа бөгөөд 2011-2013 онд Ардчилсан орнуудын хамтын нийгэмлэгийг даргалах юм.